Қозоғистон Ҳарбий-денгиз кучларининг собиқ бош қўмондони Қанат Ниязбеков Каспий денгизидаги машғулотлар вақтида ҳалок бўлган ҳарбий хизматчилар билан боғлиқ иш доирасида ҳибсга олинди. Ушбу ҳодиса натижасида 14 нафар ҳарбий хизматчи ҳалок бўлди. Президент Қосим-Жомарт Тўқаев Ниязбековни ўтган ҳафта лавозимидан озод этган эди.
Каспий денгизининг Қозоғистонга қарашли секторида 22-сентябр куни «Каспий мудофааси – 2026» машғулотлари бошланди. Ушбу машғулотда 500 нафардан ортиқ ҳарбий хизматчи иштирок этди. 24-сентябр куни эса об-ҳавонинг кескин ёмонлашиши натижасида 17 нафар ҳарбий хизматчи денгиз тўлқинлари оқизиб кетди. Фақат уч нафарини қутқариш мумкин бўлди.
Қанат Ниязбеков юз берган ҳодисани ноқулай об-ҳаво шароити ва тўлқинларнинг кучайиши билан изоҳлади. Машғулотларни ўтказишда бу омиллар инобатга олинганми, деган саволга Ниязбеков: «Умуман олганда, инобатга олинади», – деб жавоб берди. Бу йўқотиш Қозоғистон армияси тарихидаги энг катта йўқотишлардан бири бўлиб ҳисобланади.
Президент Тўқаев барча айбдорларни жавобгарликка тортишни талаб қилди. Ҳозирда беш нафар мансабдор шахс аллақачон ҳибсга олинди. Қозоғистон Мудофаа вазирлиги эса машғулотларга тайёргарлик кўриш ва уларни режалаштиришда камчилик ва қоидабузарликларни аниқлади.
Ушбу мақолани лотин алифбосида ҳам ўқишингиз мумкин.
