Олтин нархи янги тарихий рекорд ўрнатиб, илк бор унцияси учун 3200 доллардан ошди. Чикаго товар биржасида (CME) фьючерслар нархи кеча, 2 апрель куни савдолар ёпилиш арафасида 1,77 фоизга ошиб, энг юқори чўққида 3201,6 долларга етди. Бу ҳақда биржа сайтида келтирилган.
2 апрель савдолари якунларига кўра, олтин нархи 3166,2 долларни ташкил этган ва бу аввалги кундаги даражадан 0,64 фоиз юқори. Бугун, 3 апрель куни эрталаб қимматбаҳо металл олдинги кун ёпилиш нархлари атрофида сотилмоқда. Тошкент вақти билан 09:05 да фьючерслар 0,15 фоизга ошиб, унцияси учун 3170,9 долларни ташкил этган.
Олтин бозорида кескин ўсиш АҚШ Президенти Дональд Трамп янги импорт божларини эълон қилганидан кейин юз берди. Трамп жорий қилган божлар минимал тариф 10 фоизни ташкил этди, айрим давлатларга нисбатан бож миқдори 50 фоизгача етди.
“Bloomberg” нашрининг ёзишича, бу чора-тадбирлар АҚШ ҳаракатлари жаҳон иқтисодиётининг секинлашишига сабаб бўлиши мумкинлиги ҳақидаги хавотирларни кучайтирган. Оқибатда инвесторлар хавфсиз активлар қаторига кирувчи олтинга юзланмоқда. Бу эса қимматбаҳо металл нархининг ошишига туртки берди.
“Олтин бозоридаги “бузоқча” (ўсиш тенденциясидаги) динамика божлар билан боғлиқ хавотирларни акс эттиради. Ушбу тарифлар иқтисодий ўсишни сусайтириши ва иқтисодий кўрсаткичларнинг пасайишига олиб келиши мумкинлиги ҳақидаги хавотирлар олтинни қўллаб-қувватламоқда”, деди WisdomTree компаниясининг хомашё бўйича стратеги Нитеш Шаҳ.
Жорий йилнинг ўзида олтин нархи 21 фоиздан ортиқ ўсди. Ўтган йили эса нарх 27 фоиздан кўпроқ ошган бўлиб, бунга “юмшоқ” пул-кредит сиёсати, марказий банкларнинг фаол харидлари ва инвесторларнинг хавфсиз активларга бўлган талаби сабаб бўлган. Goldman Sachs таҳлилчиларининг тахминларига кўра, йил охирига келиб олтиннинг нархи 3300 доллар/унцияга етиши мумкин. Марказий банклар томонидан кутилганидан юқори талаб ва қимматбаҳо металлар билан таъминланган биржа инвестиция фондларига маблағлар оқимининг сезиларли даражада ошиши кутилмоқда. Morgan Stanley таҳлилчилари ҳам олтин бозоридаги ўсиш ҳали тугамаганини ва 2025 йилда олтин нархи 3400 доллар/унцияга етиши мумкинлигини истисно қилмаяпти.
